Epiq Night yafunika Dar

Usiku wa Epiq Night ndani ya Maisha Club utakuwa ni usiku wa kukumbukwa kwa wapenda burudani wengi hasa baada ya wasanii walioshiriki shindano la kuimba la Epiq Bongo Star Search kutoa burudani ya aina yake.

Katika usiku huo ambao ukumbi wa Maisha ulikuwa umejaza wapenda burudani na wadau mbalimbali wa muziki, ulishuhudia vijana hao wakiimba kwa mara ya kwanza mbele ya wakazi wa Dar es Salaam tokea walipoimba mara ya mwisho wakati wa fainali za EBSS pale Diamond Jubilee.

Wasanii hao wakiwa bado wana moto kutokea burudani waliyoitoa Dodoma wiki mbili zilizopita, walifanya mashabiki waliojazana Maisha kushidwa kukaa na kushangilia wakati wote.

Burudani hiyo ilifunguliwa na mkali wa Bongo fleva Rich Mavoko, akifuatiwa na kijana kutoka BSS, Vincent aliyeimba wimbo wake wa INYE NA IWE.

Ufunguzi huo, ambao ulifanya ukumbi mzima kupiga mayowe, ulizidi kupamba moto baada ya kijana toka Dodoma, Godfrey Levis alipopanda na kibao chake cha MAYA.

Shangwe zilizidi pale malkia kutoka THT, Linah alipopanda jukwaani kuimba nyimbo zake kali kama Oliva Twist na Nshafahamu kabla ya kumkaribisha jukwaani, dada mwenye sauti kali, Nsami kuimba wimbo wake wa MUONGO.

Ilibidi nguvu ya ziada itumike kuwadhibiti mashabiki pale alipopanda dada wa Taarab, Husna, ambapo uchezaji wake na kumiliki jukwaa kuliwafanya mashabiki kutaka kupanda jukwaani kumtuza wakati akiimba wimbo wake unaofanya vizuri, NAWAMIMINA.

Huku mashabiki wakizidi kushangilia kwa nguvu, dada mwingine aliyejizolea umaarufu kwa kuimba nyimbo za kiutamaduni, Nshoma, akapanda kuimba wimbo wake wa ‘MAMA AFRIKA’ ambapo uliwakonga mashabiki kwa midundo yake.

Kama hiyo haitoshi, mashabiki walizidi kushangilia pale mwimbaji bora wa kiume, Barnaba alipopanda kuimba nyimbo zake za Sorry na Magube gube.

Ilikuwa burudani baada ya burudani baada ya Barnaba kumkaribisha jukwaani mwanadada mwingine anayefanya vizuri na wimbo wake wa DREAM TONIGHT, Menina ambaye aliufanya ukumbi kumshangilia kwa uwezo wake mkubwa wa kutawala jukwaa.

Alikuwa ni Norman, aka we mbaya, aliyefanya mashabiki kujazana stejini alipopanda kuimba wimbo wake wa ‘SI WEWE’. Norman ambaye kutolewa kwake kwenye EBSS kuliwasikitisha wengi, alifanya show ambayo wengi walizidi kuamini kwamba alistahili kufika mbali.

Hadi wakati mshindi wa tatu wa shindano la EBSS, Wababa Mtuka anapanda jukwaani kuimba kibao chake cha ‘My Wife’ na Kitorondo mashabiki walikuwa bado wakishangilia namna alivoonyesha uwezo katika kuimba na kucheza.

Wa mwisho kabla ya mshindi wa milioni hamsini kupanda alikuwa ni mkali wa RNB Tanzania, na mshindi wa tuzo za kili, Ben Paul, ambaye aliwakonga nyoyo mashabiki wake kwa nyimbo zake kali kama Pete na Samboira kabla ya kumkaribisha jukwaani Walter.

Mashabiki hao waliokuwa wakimsubiri kwa hamu, walianza kupiga kelele Walter Walter, kabla ya kuwatuliza kwa kuimba wimbo wake mpya wa ‘Siachi’ akifuatiwa wimbo wake mwingine wa ‘Mamy Love’ pamoja na ‘RINGA’.

Walter alipata wakati mgumu jukwaani ambapo mashabiki walimuomba azirudie nyimbo zake zaidi ya mara tatu hali iliyoonyesha kukubalika kwa hali ya juu.

Mashabiki wengi wakizungumza baada ya burudani hiyo walionyesha kuwakubali vilivyo wasanii wa EBSS, huku wakiwatabiria makubwa.

‘Hakika vijana wana vipaji na wanajua hasa kutoa burudani, wakipewa sapoti watafika mbali sana’ alisema Jumanne Sally mmoja wa mashabiki aliyehudhuria burudani hiyo.

Ziara hiyo ya washindi wa Epiq BSS inaelekea Mtwara baada ya wiki mbili.